Forvirkar netöryggisráðstafanir

Villuveiðigátt er þjónusta sem tengir saman fyrirtæki og netöryggissérfræðinga til að bera kennsl á og laga öryggisveikleika í kerfum þeirra.

Fyrirtæki skrá sig hjá Defend Iceland og fá þá aðgang að villuveiðigátt sem býður netöryggissérfræðingum upp á verðlaun fyrir að finna og tilkynna tilteknar tegundir af veikleikum í hugbúnaði, vefsíðum eða forritum.

Netöryggissérfræðingarnir taka þátt með því að prófa kerfi innan tilgreinds umfangs og skila ítarlegum skýrslum um niðurstöður sínar.

Villuveiðigátt Defend Iceland auðveldar örugga samskipti, heldur utan um innsendar skýrslur og tryggir greiðslur á verðlaunafé til netöryggissérfræðinga. Villuveiðigáttin hjálpar fyrirtækjum einnig að efla netöryggi sitt á hagkvæman hátt með því að nýta sér færni hæfileikaríkra netöryggissérfræðinga í samfélaginu.

Defend Iceland er einstök villuveiðigátt á landsvísu sem sker sig frá öðrum villuveiðigáttum úti í heimi með að því að flýta fyrir innleiðingu villuveiðigátta hjá litlum og meðalstórum fyrirtækjum (SME) og opinberum stofnunum. Við gerum það með því að bjóða upp á framsækna villuveiðigátt sem fjarlægir algengar hindranir sem hingað til hafa tafið fyrir innleiðingu slíkra lausna.

Ríflega 95% þeirra öryggisveikleika sem netöryggissérfræðingar okkar finna voru áður óþekktir. Þetta hlutfall má rekja til þess að netöryggissérfræðingar á vegum Defend Iceland herma raunverulegar árásir og finna nýja veikleika í þeim sérsmíðuðu net- og hugbúnaðarinnviðum sem okkar viðskiptavinir nota. Hefðbundin veikleika- og skönnunartól treysta á þekkta (https://www.cvedetails.com/) veikleika og gefur því tölfræði Defend Iceland það til kynna að meiri líkur séu á því að óþekktir veikleikar séu til staðar heldur en þekktir sé miðað við viðskiptamannahóp Defend Iceland.

Villuveiðigáttin er forvirk netöryggisaðgerð þar sem sérþekking og hæfileikar netöryggissérfræðinga er virkjuð samfélaginu til góðs. Með þessari lýðvirkjun nýtast kraftar fjöldans til að finna öryggisveikleika í kerfum fyrirtækja og meðhöndla þá, áður en þeir valda alvarlegu netinnbroti, gagnagíslatöku eða gagnaleka.

Framtíðarsýn Defend Iceland er að öll fyrirtæki og stofnanir á Íslandi hafi aðgang að villuveiðigáttinni. Þannig eflum við öryggi stafrænna innviða Íslands og aukum áfallaþol samfélagsins.