Guðmundur Fertram fjárfestir í Defend Iceland

Guðmundur Fertram í Kerecis Fjárfestir í Defend Iceland

Við hjá Defend Iceland erum stolt af því að tilkynna nýja fjárfestingu frá fjárfestingafélagi í eigu Guðmundar Fertrams Sigurjónssonar, stofnanda Kerecis, og fjölskyldu hans. Með þessari fjárfestingu styðja þau við framtíðarsýn okkar um öruggara stafrænt samfélag með þróun á villuveiðigátt okkar og öðrum lausnum. Ísland er fyrsti markaðurinn þar sem þessi tækni verður sannreynd og prófuð í raunumhverfi.

Villuveiðigátt – Fyrirbyggjandi netöryggi

Netárásir byggja oft á öryggisveikleikum í hugbúnaði og netkerfum. Villuveiðigáttin okkar hermir eftir aðferðum tölvuhakkara og skipulagðra netárásarhópa til að finna veikleika áður en árásaraðilar geta nýtt sér þá. Með þessu veitum við fyrirtækjum og stofnunum forskot í netöryggismálum.

Tölfræði okkar sýnir að yfir 95% þeirra veikleika sem Defend Iceland greinir eru áður óþekktir í hefðbundnum skönnunartólum. Þetta undirstrikar mikilvægi nýrra og markvissari lausna í netöryggi.

Öflugir fjárfestar styðja áframhaldandi vöxt

„Það er mikið gleðiefni að fá farsæla og reynslumikla frumkvöðla á borð við Guðmund Fertram og Fanneyju inn í eigendahóp Defend Iceland. Fjárfesting þeirra, sérþekking og reynsla mun styðja við áframhaldandi vöruþróun og vöxt félagsins á markaði þar sem þörfin fyrir fyrirbyggjandi netöryggisaðgerðir eykst sífellt. Við erum þakklát fyrir traustið sem þau sýna okkur og hlökkum til samstarfsins,“ segir Theódór Ragnar Gíslason, stofnandi Defend Iceland.

Guðmundur Fertram Sigurjónsson tekur undir: „Netglæpum fjölgar hratt og aðferðarfræði Defend Iceland er einstök og svarar þeim áskorunum sem fyrirtæki og stofnanir um allan heim glíma við. Hugmyndafræðin og tæknilausnirnar sem eru í þróun eiga erindi út um allan heim og okkur hlakkar til að taka þátt í þeirri vegferð.“

Fanney Kr. Hermannsdóttir bætir við: „Netöryggi er ekki bara mikilvægt fyrir fyrirtæki, heldur fyrir allt samfélagið. Það er ánægjulegt að fá að taka þátt í að byggja upp öruggara stafrænt umhverfi fyrir alla. Við trúum á framtíðarsýn Defend Iceland og sjáum hana sem mikilvægt framlag til öruggara samfélags.“

Samfélagssjóður Defend Iceland

Við leggjum mikla áherslu á samstöðu í netöryggismálum og höfum stofnað samfélagssjóð sem styður við ábyrgari tilkynningar og opinberun öryggisveikleika. Sjóðurinn er fjármagnaður af viðskiptavinum og netöryggissérfræðingum sem vilja ekki aðeins tryggja eigið netöryggi, heldur stuðla að öruggara stafrænu samfélagi. Hann veitir einnig styrki til lítilla fyrirtækja og óhagnaðardrifinna aðila sem þurfa að verja viðkvæm gögn og innviði.

Evrópskur stuðningur og alþjóðleg tækifæri

Defend Iceland hefur einnig hlotið styrk frá Tækniþróunarsjóði og notið stuðnings Evrópusambandsins, sem veitti verkefninu 380 milljónir króna í gegnum Digital Europe áætlunina. Í umsögn sinni lagði Evrópusambandið áherslu á að Ísland væri kjörinn markaður fyrir slíkar lausnir og að verkefnið hefur burði til að nýtast á alþjóðavísu.

Fjárfesting Guðmundar Fertrams og fjölskyldu hans, ásamt evrópskum stuðningi, styrkir Defend Iceland í vegferð okkar að því að skapa öruggara stafrænt samfélag – bæði á Íslandi og víðar.