Kóði og Defend Iceland í samstarf

Kóði og netöryggisfyrirtækið Defend Iceland hafa gert samning um aðgang að hugbúnaði villuveiðigáttar fyrirtækisins til að fyrirbyggja árásir á net- og tölvukerfi Kóða.

Með notkun villuveiðigáttarinnar nýtir Kóði fremstu aðferðir í netöryggi til að auka viðnámsþrótt net- og tölvukerfa fyrirtækisins og eykur þar með öryggi upplýsinga um viðskiptavini sína. 

Markmið Defend Iceland er að búa til öruggara stafrænt samfélag. Aukin þekking á tilvist og eðli öryggisveikleika í kerfum fyrirtækja og stofnana er forsenda þess að þessu markmiði verði náð, enda fjölgar netárásum skipulagðra glæpahópa hratt.

Thor Thors, framkvæmdastjóri Kóða:

„Kóði leggur mikla áherslu á öryggismál í sinni starfsemi. Öll fjármálafyrirtæki landsins nota hugbúnaðarlausnir frá okkur og þúsundir fyrirtækja treysta á lausnir eins og Keldan.is og Hluthafaskra.is. Viðskiptavinir sýna okkur mikið traust og við viljum að kerfin okkar séu eins örugg og kostur er. Við hlökkum til að vinna með Defend Iceland og auka öryggi enn frekar í stafrænum heimi.”

Jóhanna Vigdís Guðmundsdóttir, stjórnandi viðskiptaþróunar-, sölu- og markaðsmála Defend Iceland:

„Við hjá Defend Iceland leggjum áherslu á mikilvægi forvirkra netöryggisaðgerða, sérstaklega þegar kemur að viðkvæmum gögnum og lykilinnviðum samfélagsins. Stór hluti fjármálakerfisins er nú þegar kominn í viðskipti við Defend Iceland og það er okkur því sérstakt ánægjuefni að Kóði, leiðandi aðili í þjónustu við fjármálafyrirtæki, noti nýjustu tækni í baráttunni við netárásir. Við bjóðum Kóða hjartanlega velkominn í hóp viðskiptavina Defend Iceland og hlökkum til að vinna með fyrirtækinu að öruggara stafrænu samfélagi.”

Í villuveiðigátt Defend Iceland eru aðferðir tölvuhakkara og skipulagðra netárásarhópa hermdar til að leita með markvissum hætti að veikleikum í upplýsingatæknikerfum notenda kerfisins. Þannig er hægt að lagfæra öryggisveikleika áður en tölvuglæpamenn nýta þá til að brjótast inn, ná stjórn á viðkomandi kerfum og framkvæma gagnagíslatöku.